Ekapolon kosi ka Akuj kosi! ejoikinit iyong ianyuni ekipur ka arimatoi ta apolou. Kainyo isubi kolong iyong ngiboro daang, ani kotere echami kon, toliworos kesi lu eyerete. (Akitoodikinet 4:11)
Awaar Akiroit a Ngikiristoi erai Akuj bon ngesi erai ekarikon lo eyari ka loaiteni. Akuj bon ngesi ersi Ekile ka ekapolon aibore kadaang ani eyei. etiakak noi ka ngikarikok lukaalak a ngitunga. Nyedemi ngesi ngitunga ngiboro lueraakasi ngikech na nabo nyesubi ngesi etich kotere koon keng a elope. erai Akuj ekarikon loajokon lo eyei echami noi, iyoki ngesi akwap keng iposi nabo deng a apatanu ngirwa daang, erikit ngesi akwap aiteni.
Akuj ngesi epolokinit ngiborei daang kotere ngesi kolong asubi.Akuj ngesi erai akisiakinet ka akisub daang na eyekasi, aapei ka akwap naajokon na kilomit ngoni. erai naga akwapit keng. Ngesi asubi, nabo kitoweik.
Kisubuni Akuj tani ngoni ngitunga.
Kisubuni Akuj ngoni ngitiunga nabo kiinak apachole naajokon noi anakwapit keng anaajokon, Kiinakini ngoni Akuj ngikilinga a apolokin akwap ka aweikin –nabo ngikaru daang atorimas Akuj ka akipup ngesi erai ekarikon yok, atobuakisi ngesi alakara kotere apatanu keng.
Kikoni ngoni daang ngamesekin na echakara, itorit itwaan daang lorot keng a ilope… (Isaya 53:6a)
Akisiakinet a ibore ka daang aniaronon anakwap erai nikolong atiakuniata ngitunga niaronon. Napei anakisiakinet nyechamuna ngoni Akuj toliwor ekarikon yok.kingeri ngoni Akuj jik eningo akiboi eboyor ka akiwapit ngirotin yok make kitopengi ngesi.
Kisubi ngoni daang nugu aloboyor yok.
Ngasaae nakaalak, kimuriakinit ngoni Akuj ori kiwaakinit ngoni ngesi nialonan, eboikinos eboyor yok make emam ngesi. Nyikibuakinit ngesi alokara loger lo echamitere kisubi eri ekasubununan yok lokapatanan lokiyokii ngoni.Nyikirima ori nyikipupi loger lo echamitere ekarikon yok. Kiwapit ngoni etereku yok ka ngakiro yok, kiboi eboyor lo kijoikinit ngoni ngikulepek.
“Ngasechasia” ngesi erai ekiro a Abibilia anakisech kangina aniAkuj. Ebala Abibilia kisubi ngoni daang ngasechasia–iraakasi ngitunga a ediin ori mam.
Anakisech kangina kirau ngoni ngikujo lu nyerai luaiteni, Atamar arau itwaan daang ekile aloboyor keng ailopeelosi alochami keng ailope. Iningit itwaan daang asubea akwapit ka ngitunga luche a ngaseket keng a ngikulepek.
Nyikitalari akingolikin atamar nyikipedori tani ariko make, kanguna kidolit naaronok, aapei ka nginyas luaronok nakiinuna ngoni make, nauyei yok ka akwap elulung.
Etoani itwaan daang atoanet apei ani erumor kirira akuj… (Ngieburaniae 9:27)
Erai Akuj ekarikon loajokon nakaneni akisech na kisechkinit ngoni ngesi meere ibore ni edit anikeng. Kirirae ngoni Akuj a ngitichisio yok . Kotere erai ibore ajokon noi anikeng eger lo kirubakinitor ngoni kilosi ngaren. Erai akiroit napotion noi atamar kimenyarit ngoni Akuj , ka asubea ngitunga luche niaronon, kinyasu nabo akwap keng.
Nyechamuni Akuj akisech torubak eyei ngikaru daang. Kerai kolong kimiek Akuj akisech emam eriras, pekesubit Akuj iteni.
Kitee ngoni daang eriras a Akuj anakitu amam kolong akitu ka aboliaro ekingaren. Nginyas, aronis ka akitu eraakasi epewe a akideto yok kotere kingeri ngoni Akuj.
Nakaneni, eyei eriras eche lo monan kidoli. kiwei ngoni daang alongaren Akuj atolemutu ekimar a eboyor yok, anaronok anakisubit ka eger lo kingerio Akuj ekarikon yok.
Akolongit ngina na eriras kiinakini ngoni Akuj ibore nikolong kisaki, atamar achadar ani a Akuj. Kitieki ngoni ka ngesi noi. Atiaka ka Akuj lokojokon eger keng ngesi atamar akinyasuno napenyedaun, kotere erai akisiakinet a akiyar ka ngiberei luajokak.
Kitubuli akulit ngina noi. Nakaneni kidolo ka ngoni daang kainyo echakinit ipei yok daang Akuj.
Kikoni ngoni daang ngamesekin na echakara itorit itwaan daang lorot keng ailope. Nakaneni abu Ekapolon Akuj Kirira ngesi, eriras lo erai eyok kadaang. (Isaya 53:6)
Echamit Akuj akwap keng nakolong asubuni, ani erumor kichamit ngoni daang. nyeisikina Akuj ngoni kidoli etachit a akisech yok. Ameuni Akuj lokookeng ailope nakwap. Yesu kristo ngesi erai lokookeng a Akuj, ameuni Akuj kitoyiuu ngoni.
Nyesechakina Yesu Akuj loger yok. Ayei ngesi ngirwa daang nasaket a Akuj nabo eboi alokwap ngarekinet keng. Abuakinit Yesu Akuj alakara ka arima ngesi ngasaae daang. Apupi Yesu Akuj anibore kadaang. Pe achamakina ngesi edoli eriras a Akuj a eger kadaang. Peachamakina ngesi etoani.
Iteni ngesi atamar abu Yesu totoan. Tani kolong keinakinit Akuj Yesu ngikilinga lu itangalekinio ngikadekak ka nabo lu iteyarunia ngikatoak, abu ngesi tocham aboliaro anierumor taarae anapir. Kotere nyo?
Ngakiro na kitalarete kesi nugu: Atoani Yesu kotere ngoni, kotere ngikasechak lu ikote ngoni. Ewoki ngesi bon eris ka akulit na adikino eliwor ayok, na atoanea anapir kotere ngoni. Erai akitu akulit a akisech, atoani Yesu akitu nadikino erai ngoni kidoli.
Pekichamakinitae ngoni nugu daang kotere kingeri ngoni Akuj. Nakaneni kotere echami keng loapolon, ameuni Akuj lokookeng totoan kotere ngoni.
Atobuakisi Akuj ka Apa a Ekapolon yok Yesu Kiristo alakara! Kona kisienitor ngoni ngesi noi, kitaanyu ngesi ngoni akigieno na a akiyar (1 Petero 1:3)
Achamuni Akuj akitu a Yesu toliwor etachit loitiomokino kotere ngasechasea yok daang, abu kiteyeru ngesi anakitu. Edwangi Yesu akitu. Ayaruni Yesu sodi toliwor ekarikon a akwap loger lokolong arekinitor Akuj anakisiakinet.
Atiekuni Akuj Yesu toliwor ekarikon kadaang nakaneni, Awaakini Akuj ngesi toliwor ekiriran a akwap. Na ebongunio Yesu ka na enangia akolongit na eriras, Yesu ngesi kirirae ngoni kotere akisech yok ania Akuj.
Meere Yesu ekapolon ka ekeriran bon, erai Yesu ekayuunan lo kiyuuni aloriras. Kotere atoani ngesi kotere ngon, eyei Yesu arimakin ngasechasea yok. Erira kolong akuj ka akidet ngasechasea yok daang anakitu a Yesu. Tokona kipeyeunitoe akisiekin nakitetet ka Akuj. meere ngikasechak nabo nakaneni kirau ngipaalon luenupitae, kibuakinit ngesi alakara ka arima daang.
Kipeyieunit ngoni Yesu atoriamutu anikeng akiyar nakitetet. Anakiyar kangina Akuj alope ebuni kiboikin tooma yok a Etau keng. Kiriamuni alakara ka aelo nakitetet ka Akuj.
Nabo na ebunio Yesu nabo ka ekipur keng kiyeni iteni dir atamar kichamakinio anikeng–meere kotere kijokak, erai kotere ayari ngesi akideto na arai ayok na atoania kotere ngoni.
Nienupit Lookeng eyei ngesi akiyar na nyedaun, ni nyenupit lokookeng nyeanyuni akiyar, nakaneni emini anyunyura a Akuj nikeng. (Yoana 3:36)
Eyia ngirotin ngarei lo etiekunere akiyar. erot lo ekingaren ngesi arubakin akiboi kisechakinit Akuj –akimenyar Akuj ka akiboi eboyor lokijoikinit ngoni ngikulepek. Iteni etiekununete ngitunga lukaalak erot logo nakaneni kisialolongi noi.
Ani esal, alotunga alu etiakunete erot logo, irirae Akuj kesi a iteni. emam kona ebucharoi aloriras kangolo. itwaan daang ni engerit akuj eriamunit tokona ngakiro naaronok a aronis kangina aloboyor keng, nakeni nabo iriamunosi ka akulit na kitubuli, eger keng ngesi atiaka ka ereet a Akuj ngikaru ka ngikaru.
Nakeni eyei erot eche. Anikereun ngon nia Akuj elipa kitorimak, kinupit Yesu lo ayeruni tarau ekarikon ka ekayuunan, dio ilokonyikin ibore daang.
Ekingaren elemari Akuj jik nakisech yok. achamuni akitu a Yesu toliwor akulit a akisech yok anikeng. Kirimakini ngesi ngoni ngasechasea yok daang pas. Ebukonokini ngesi Etau keng ailope tooma lotai yok. kiinakinit ngoni akiyr nakitetet na angikaru ka ngikaru. Tani bo kitwaki deng kiteyerunio eboikinos aapei ka ngesi ngikaru ka ngikaru. Meere ngoni ngikasechak nabo, pearai kirau ngika awi a Akuj. Tokona kiboi alokwap ngarekinet a Yesu, lokookeng a Akuj ka ekarikon yok.
Eyakasi ngirotin ngiarei make lu eyerere.
Ani anakingiset “Isaki iyong akiboikin alorot kaali” arai atachunet kon “alorot yok”, idodiunit ibore ngini atamar nyenupa iyong akiroit a Ngikiristoi loger lo etatamere a ngakiro kanguna. Epedori tani tarau nyenupa iyong akiroit epewae ori daang. ori nyenupa iyong atamar kirai ngoni ngikasechak ania Akuj, ori ayaruni Yesu alokatoak.
Ani kikote neni, kemaimai atamari kitama lokojokon noi nabo toripia noi,. Erai akiroit ajokon noi , nabo nyechamakina kingeri akiroit naga nyeyena iteni. Erai niajikon isomae yong kidiama Yesu Anabibilia – tarai cha noi anakitabea ana enyaritae Ngakiro naajokak a Matayo, Mariko, Luka ka Yoana. Ipedori iyong tosub kongina ka epae lo erai ekiristoit ( Ani kemam Abibilia kining bible.com/tur/bible)
Nakaneni, anikiyeni noi atamar isechakinit Akuj, na tasaki abongokin ngesi akisiekin akiyar nakitetet a echami keng, aloger kaali isubakinea iyong kongina?
Eyakasi ngirotin nguuni lulelek, kesi Akiruro, akipup ka akinup.
1. Kiruoro ka Akuj Ibore ni ekingaren ni isubi iyong erai akiruoro ka Akuj. Ipedori tolim a akituk kon anikeng atamar isechakinit iyong ngesi nabo echamakinitae idoli akulit, nabo kilip ngesi kitorimak ngasechasea kon daang kotere atoani ngesi kotere iyong. Kilip Akuj kingarak toisik asechakin ngesi nabo tasak noi akiboikin kwap ngarekinet a Ekile Yesu Kiristo. Tokona ipedori iyong kilip kona:
Akuj Apa
Ayeni atamar nyetiomokino alongaren kon. nyechakina tani adoli ainakinet kon a akiyar ananyedaun. Asech ayong ani angerio ani kasechakinea iyong ka akinger echami kon. kariebete ayong noi ngasechasea kang nabo kabulit. Asaki arimakino kon.
Eerocha ani imeunia lokookon totoan kotere ayong sodi katorimakinere. Eerocha atamar ayaruni ngesi alokatoak sodi atoriamunia akiyar nakitetet.
Kelipit kitorimak nabo kibele atoliwor nikitetet, sodi atopedorea akipup Yesu arima ngesi erai ekarikon kang Amen.
2. Topup Yesu Ibore niangiarei arumoret a akilung ngasechasea kon akilip Akuj arimakino(loger a akilip ana eyei kidiama) kiwapuu erot lo angiarei. Itemokino noi akilip akilipet na akibelo tokitetenuu aloboyor kon. Itemokino akisiekin nakitetet alosikin Yesu Kiristo ka akipup ka arima ngesi.
Itemokino kilokonyi ngakiro daang a eboyor yok. Kongina itemokino kiisikini ngakiro nakolong kisubi anakisech( ngakiro naikote amonis, angoit, amina koon, ka ngakiro ngache naikote nguna.) Nakaneni eya ngakiro ngache na italakarito Akuj ngakiro nguna ngesi echamit kilemari atosubeta etich ( ngakiro naikote apatanu, ajokis, echami ka anaikin. )
Erubi erot na lo elosi ngaren aloboyor kon kadaang, nakaneni emini akuj aapei ka iyong kisurori ngesi iyong na isomaa akiroit keng ngesi Abibilia. erubi ngesi kipupokinit iyong ka akingarakin iyong na ilipea iyong ngesi; Kotere Etau keng lo eyei tooma kon kibele Akuj iyong tarau nikitetet kiinak iyong ngikilinga kiboikinor lorot keng. Kisiriemi Akuj iyong ka Ngikiristoi luche kiinakis iyong etau ka akitogogong iyong.
Kongina erot loangiarei ngesi akipup Yesu Kiristo ka akisiekin akiboi alokwap ngarekinet keng Yesu ekarikon kon.
3. Tonup Yesu Erot loanguuni elosi ngaren. Itemokino alosit ngareni kuwaak anupit kon nia Yesu.
Eyei erot epei bon lo eriamunia itwaan ekisil Anakuj. Epedorio arimakin ka amorikin ka Akuj kotere bon ( ka akitu ka ayarun keng). eyuunio itwaan enupit Yesu bon. erai akisiekin a ayuuno kadaang ka eboyor daang erai Yesu ka akitu ka ayarun keng. Tona kirai Ngikiristoi daang isaki akiboikin lorot a Akuj, toroko isechi ka akisub niaronon. Tani kaneni akisiekinet a yuuno ngesi ngina ngina. Esakitae ngini atonupa ka akigenokin Yesu ka akitu keng alomsalaba ngolo ngesi erai ibore bon nikirimakinere ngoni.
Nyesakitae ngoni atoisikisi akigeno Yesu bon tarau eger bon lo kirimakinere ngoni ka ainakin akiyar nanyedaun.
Ani kitiaku iyong ngirotin lugu ipedori iyong toting iteni atamar kiramak Akuj iyong ngasechasea kon daang nabo kiinak akiyar nakitetet.
Anikeroko iyong nyiikina Akuj alorotin kalu, ipedori iyong toting iteni atamari eyei anyunyura a Akuj kidiama kon.
Enang iyong nikaagongon alorot a. eya ngirotin ngiarei make lu eyerere. Echamakina ngoni kitiakuni epei a ngirotin aluarei kalu.
