Msingi wa ujumbe wa Kikristo ni kwamba Mungu peke yake ndiye mtawala aliye hai na wa kweli. Mungu ndiye Bwana na Mfalme wa kila kitu kilichopo. Tofauti na watawala wengi wa kibinadamu, Mungu si fisadi wala si mwenye kujitumikia. Mungu ni mtawala mwema na mwenye upendo kabisa, akitunza ulimwengu wake na kutoa kwa ukarimu siku zote, naye huutawala ulimwengu kwa haki.

Kwa sababu Mungu aliumba kila kitu, Mungu ndiye mtawala wa kila kitu. Mungu ndiye chanzo na muumba wa yote yaliyopo, pamoja na ulimwengu mzuri ambamo tunaishi. Huu ni ulimwengu wake. Aliuumba, na anausimamia.

Pia Mungu alituumba sisi wanadamu.

Mungu alituumba sisi wanadamu na akatupa nafasi ya kipekee katika ulimwengu wake mzuri. Mungu alitupa sisi wanadamu mamlaka ya kuutawala ulimwengu, kuutunza na kuusimamia—na wakati wote kumheshimu Mungu na kumtii kama mtawala wetu, na kumshukuru kwa ukarimu wake.

Chanzo cha kila kitu kibaya katika maisha yetu na katika ulimwengu ni wakati ule ambapo binadamu walichagua vibaya. Tangu mwanzo kabisa, hatukutaka Mungu kuwa mtawala wetu. Tulimkataa Mungu kabisa na tukajaribu kuishi kwa kuzifuata njia zetu wenyewe tukipingana naye.

Sisi sote tunafanya hivi katika maisha yetu. 

Muda mwingi, tunamsahau Mungu au kumweka mbali, na kuishi maisha yetu wenyewe kama hayupo. Hatumshukuru kama itupasavyo akiwa muumba wetu mkarimu atutunzaye. Hatumheshimu wala kumtii kama astahilivyo mtawala wetu. Tunafuata tamaa zetu na mambo yetu, na tunaishi jinsi tunavyoona kuwa bora sisi wenyewe.

“Dhambi” ndilo neno la Biblia kwa uasi huo dhidi ya Mungu. Biblia inasema sisi sote tunatenda dhambi—ikiwa ni watu wa dini au la.

Kwa uasi huo sisi wanadamu tumejifanya miungu wasio kweli, yaani kila mmoja amejifanya bwana juu ya maisha yake mwenyewe, akienenda kwa mapenzi yake mwenyewe. Kila mmoja hujaribu kuutumia ulimwengu na kuwatumia watu wengine kwa mapenzi na manufaa yake mwenyewe.

Haishangazi hata kuona inashindikana. Hatuwezi kujitawala na hivyo tunapata matokeo mabaya, pamoja na madhara makuu ambayo tunaleta juu yetu wenyewe, juu ya jamii, na juu ya ulimwengu.

Mungu ni mtawala mwema na kwa hiyo uasi wetu dhidi yake sio jambo dogo kwake. Mungu anatuwajibisha kwa matendo yetu. Maana ni muhimu kwake jinsi tuenendavyo. Ni jambo zito kwamba tumemdharau Mungu, na tumewatendea vibaya watu wengine, na tumeharibu ulimwengu wake.

Mungu hataruhusu uasi uendelee milele. Ikiwa Mungu angeacha uasi bila hukumu, ingekuwa amekosa kutenda haki.

Tunaona hukumu ya Mungu dhidi ya uasi wetu katika kifo. Mateso na kifo sio asili. Uharibifu, ubovu na kifo katika ulimwengu ni sehemu ya adhabu yetu kwa sababu tulimkataa Mungu.

Lakini kuna hukumu zaidi ambayo tutaikabili. Sisi sote tutasimama mbele za Mungu na kutoa hesabu ya maisha yetu, kwa mabaya tuliyofanya, na kwa vile tulivyomkataa Mungu mtawala wetu.

Siku ile ya hukumu, Mungu atatupatia kile tulichokitamani, yaani, kuwa mbali naye. Atatutenga naye kabisa. Kutengwa na Mungu kabisa, maana yake ni maangamizi yasiyoisha, kwa sababu Mungu ni chanzo cha uzima na vitu vyote vizuri.

Adhabu hiyo inatisha kweli. Lakini sisi sote tunakabiliana nayo maana kila mmoja tumemwasi Mungu.

Mungu anaupenda ulimwengu aliouumba, na anatupenda wote kila mmoja. Mungu hakutuacha tupate matokeo ya uasi wetu. Mungu alimtuma mwana wake mwenyewe ulimwenguni. Yesu Kristo ndiye Mwana wa Mungu, na Mungu alimtuma ili atuokoe.

Tofauti na sisi, Yesu hakuasi dhidi ya Mungu. Siku zote aliishi kwa mapenzi ya Mungu na chini ya mamlaka yake. Wakati wote Yesu alimheshimu na kumshukuru Mungu. Yesu alimtii Mungu katika kila kitu. Hakustahili hukumu ya Mungu kwa namna yoyote. Hakustahili kufa.

Lakini hakika Yesu alikufa. Ingawa Mungu alimpa Yesu mamlaka ya kuwaponya wagonjwa na hata kuwafufua wafu, lakini Yesu alikubali kuangikwa na kuuawa msalabani. Kwa nini?

Habari za kushangaza ni hizi: Yesu alikufa badala yetu, mbadala wa waasi kama sisi. Alichukua mwenyewe hukumu na adhabu ambayo tulistahili, kwa kufa msalabani kwa ajili yetu. Kifo ni adhabu ya uasi, na Yesu alikufa kifo ambacho sisi tulistahili kufa.

Hayo yote sisi hatukustahili maana tulimkataa Mungu. Bali kwa sababu ya upendo wake mkuu, Mungu alimtuma Mwanawe afe kwa ajili yetu.

Mungu alikubali kifo cha Yesu kama malipo kamili kwa dhambi zetu zote, na akamfufua katika wafu. Yesu alishinda kifo. Yesu alifufuka ili awe mtawala wa ulimwengu kama ilivyokuwa kusudi la Mungu kwa wanadamu hapo mwanzoni.

Yesu alichaguliwa na Mungu kuwa mtawala wa vyote na hivyo, Mungu alimweka kuwa mhukumu wa ulimwengu. Wakati Yesu atakaporudi na siku ya hukumu itakapokuja, Yesu ndiye atakayetuhukumu kwa uasi wetu dhidi ya Mungu.

Yesu si tu mfalme na mhukumu lakini pia Yesu ni Mwokozi atuokoaye kutoka kwenye hukumu. Kwa sababu alikufa kwa niaba yetu, Yesu yuko tayari kusamehe dhambi zetu zote. Mungu alikwisha kuhukumu na kuadhibu dhambi zetu zote katika kifo cha Yesu. Na sasa tunakaribishwa kuanza upya na Mungu, sio waasi tena bali marafiki waaminifu, tukimshukuru na kumpa heshima yote.

Yesu anatukaribisha kupokea kwake uzima mpya. Katika uzima huo Mungu mwenyewe anakuja kuishi ndani yetu kwa Roho wake. Tunapata furaha ya uhusiano mpya na Mungu.

Na Yesu atakaporudi tena katika utukufu wake wote, tunaweza kuwa na uhakika kabisa kuwa tutakubaliwa kwake—sio kwa sababu tunastahili, lakini kwa sababu alichukua adhabu yetu alipokufa kwa niaba yetu.

Kuna njia mbili za kuamua kuishi. Njia ya kwanza ni kuendelea kuishi katika uasi wetu dhidi ya Mungu—kumdharau Mungu na kuishi jinsi tunavyoona kuwa bora sisi wenyewe. Kweli watu wengi wanachagua njia hii na inasikitisha.

Hatimaye, kwa watu wanaochagua njia hii, Mungu atawahukumu kwa haki. Hiyo hukumu haiepukiki. Kila mmoja anayeendelea kumkataa Mungu anapata sasa katika maisha yake matokeo mabaya ya uasi ule, lakini pia anakabiliana na adhabu inayotisha, yaani kutengwa na uso wa Mungu milele.

Lakini kuna njia nyingine. Ikiwa tunamgeukia Mungu na kumwomba msamaha, tukimwamini Yesu aliyefufuka kuwa mtawala na mwokozi, basi kila kitu kinabadilika.

Kwanza, Mungu anaondoa kabisa hatia yetu. Anakubali kifo cha Yesu kuwa adhabu ya uasi wetu dhidi yake. Anatusamehe bure dhambi zetu zote kikamilifu. Anamimina Roho yake mwenyewe ndani ya mioyo yetu. Anatupa uzima mpya wa milele. Japo tutakufa, lakini tutafufuliwa na kuishi naye milele. Sisi sio waasi tena, lakini ni wa familia ya Mungu. Na sasa tunaishi chini ya mamlaka ya Yesu, Mwana wa Mungu, mtawala wetu.