Il-pedament tal-messaġġ Nisrani huwa dan: Alla huwa s-Sultan ta’ kollox, l-uniku wieħed veru u ħaj. Huwa l-Mulej u r-Re ta’ kulma jeżisti. Għall-kuntrarju ta’ ħafna mexxejja umani, Alla mhuwiex korrott u egoist. Huwa Sultan tassew tajjeb u jħobb, li jkompli jipprovdi għad-dinja tiegħu b’ġenerożita, u jmexxiha bil-ġustizzja.

Alla huwa s-Sultan ta’ kollox minħabba li huwa ħalaq kollox. Hu s-sors u l-ħallieq ta’ dak kollu li jezisti, inkluż it-tajjeb u l-ġmiel tad-dinja li ngħixu fiha. Din hija d-dinja tiegħu. Hu għamilha u jmexxiha.

Ħalaq lilna wkoll.

Alla ħalaq l-umanità, u tana post uniku fid-dinja tajba tiegħu. Hu kmandana biex immexxu d-dinja, nieħdu ħsiebha, u nkunu responsabbli għaliha—dan kollu waqt li nonorawh u nobduh bħala s-Sultan tagħna, u nirringrazzjawh għal-ġenerożità tiegħu.

Dak kollu li hemm ħażin f’ħajjitna u fid-dinja jiġi mill-għażla fatali li l-umanità għamlet. Mill-bidu nett, ma ridnix lil Alla jkun is-Sultan tagħna. Aħna ċħadnieh bħala Alla billi ddeċidejna li ngħixu bil-mod tagħna, bi sfida kontra l-awtorità tiegħu.

Aħna lkoll nagħmlu hekk f’ħajjitna.

Ħafna drabi, aħna sempliċement ma nagħtux kas lil Alla jew nitbiegħdu minnu, u nkompli ngħixu kif ifettlilna. Ma nirringrazzjawhx kif suppost talli ħalaqna u jipprovdilna b’mod ġeneruż. Ma nagħtuhx unur u ma nobduhx bħala s-Sultan tagħna. Nimxu wara ix-xewqat u l-prijoritajiet tagħna, u ngħixu bil-valuri li niddeċiedu huma l-ahjar (kemm reliġjużi, sekulari, jew taħlita tat-tnejn).

Il-kelma komuni fil-Bibbja għar-ribeljoni kontra Alla hija “dnub,” u aħna kollha nwettquha—anke jekk nsegwu jew ma nsegwux religjon partikolari.

Insibu lilna nfusna f’dinja mimlija b’“allat” żgħar. Nagħmlu lkoll l-affarijiet bil-mod tagħna u nipprovaw nġiegħlu lid-dinja u lil dawk ta’ madwarna jċedu għar-rieda tagħna.

Mhijiex sorpriża li dan ma jġib ebda suċċess. Il-mod tagħna ma jirnexxix u nsofru l-konsegwenzi, inkluż il-ħsara li nagħmlu lilna nfusna, lin-nies ta’ madwarna, u lid-dinja li ngħixu fiha.

Bħal kull mexxej tajjeb, Alla jimportah tant illi jieħu r-ribeljoni tagħna bis-serjetà. Iżommna responsabbli għall- azzjonijiet tagħna għax jagħti kas meta niddiżonorawh, nittrattaw nies oħra daqshekk ħażin, u neqirdu d-dinja tiegħu.

Fi kliem ieħor, Alla mhux ħa jħalli r-ribeljoni tagħna tkompli għal dejjem. Ma jkunx ġust jekk jagħmel hekk.

Aħna nesperjenzaw il-ġudizzju t’Alla kontra r-ribeljoni tagħna fir-realtà tal-mewt. It-tbatija u l-mewt mhumiex naturali. Il-korruzzjoni, it-taħsir u l-mewt fid-dinja huma parti mill-kastig t’Alla talli l-umanità tiċħdu.

Imma hemm ġudizzju ieħor li se niffaċċjaw. Ilkoll kemm aħna xi darba se nidhru quddiem Alla u nagħtuh kont ta’ ħajjitna, għall-ħsara li għamilna, u talli ċħadnieh personalment bħala l-mexxej tagħna.

Is-sentenza li Alla se jaqta’ dakinhar se tkun dik li nkunu tlabna—separazzjoni minnu. Se jaqtagħna minnu għal dejjem. U peress li Alla huwa s-sors tal-ħajja u ta’ kull ħaġa tajba, jekk ninqatgħu minnu jfisser qerda bla tmiem.

Din ħaġa terribbli, meta taqa’ taħt is-sentenza tal-ġudizzju t’Alla. Hija realtà li lkoll niffaċċjaw, għax ilkoll ħatja talli rribellajna kontra Alla.

Alla jħobb id-dinja li ħalaq, u jħobbna. Ma ħalliniex inbatu l-konsegwenzi tar-ribeljoni tagħna. Bagħat lill-Iben divin tiegħu fid-dinja biex isalvana: il-bniedem Ġesù Kristu.

B’kuntrast magħna, Ġesù ma rribellax kontra Alla. Dejjem għex taħt il-liġi t’Alla, billi tah ġieħ u radd il-ħajr, u obdieh f’kollox. Ma kienx jistħoqqlu l-ġudizzju t’Alla bl-ebda mod. Ma kienx ħaqqu l-mewt.

Madankollu Ġesù miet. Għalkemm kellu l-qawwa t’Alla biex ifejjaq il-morda u saħansitra jqajjem il-mejtin, Ġesù ħalla lilu nnifsu jiġi maqtul fuq salib Ruman. Għaliex?

L-aħbar straordinarja hija li Ġesù miet bħala sostitut għal ribelli bħalna. Ħa fuqu nnifsu l-ġudizzju u l-kastig li ħaqqna aħna, billi miet fuq is-salib f’postna. Il-mewt huwa l-kastig għar-ribeljoni, u miet il-mewt tagħna.

Ma jistħoqqilna xejn minn dan kollu. Aħna ċħadna lil Alla, imma permezz ta’ mħabbtu tant kbira, bagħat lil Ibnu biex imut għalina.

Alla aċċetta l-​mewt taʼ Ġesù bħala ħlas sħiħ għal dnubietna, u qajmu mill-​imwiet. Ġesù għeleb il-mewt, u qam biex ikun dak li l-bnedmin dejjem kellu jkun: il-Mexxej tad-dinja t’Alla.

Bħala l-​Mexxej t’Alla, Ġesù nħatar ukoll bħala l-​Imħallef t’Alla tad-​dinja. Meta Ġesù jirritorna u jasal jum il-​ġudizzju, se jsejħilna biex nagħtu kont tar-​ribeljoni tagħna kontra Alla.

Imma Ġesù mhuwiex biss is-Sultan u l-Imħallef maħtur minn Alla; Hu wkoll is-Salvatur mill-ġudizzju. Minħabba l-mewt tiegħu f’postna, issa joffri li jaħfrilna. Dnubietna kollha diġà ġew imħallsin. Issa nistgħu nagħmlu bidu ġdid m’Alla, mhux aktar bħala ribelli imma bħala ħbieb leali, billi nagħtu ħajr u unur kollu lilu.

F’dil-ħajja ġdida li joffri Ġesù, Alla nnifsu jiġi jgħix ġewwa fina permezz tal-Ispirtu tiegħu. Nistgħu nesperjenzaw il-ferħ ta’ relazzjoni ġdida m’Alla.

U meta Ġesù jerġaʼ lura fil-​glorja kollha tiegħu, nistgħu nkunu totalment kunfidenti li se nkunu aċċettati quddiemu—mhux għax ħaqqna li nkunu, imma għax ħa l-​kastig tagħna billi miet f’postna.

L-ewwel triq kif ngħixu hi illi nkomplu fir-ribeljoni tagħna kontra Alla—ninjorawh u nmexxu ħajjitna kif jidhrilna aħna. Traġikament, din hija l-għażla li ħafna nies ikomplu jagħmlu.

Meta ngħixu b’dal-mod ir-riżultat ikun il-ġudizzju inevitabbli u ġust t’Alla. Mhux biss ikollna niffaċċjaw il-konsegwenzi ħżiena talli nkunu ċħadna lil Alla fil-preżent, imma jkun baqa’ r-realtà kerha ta’ eternità f’separazzjoni minnu.

Imma hemm triq oħra. Jekk nduru lejn Alla u nitolbu maħfra, nafdaw f’Ġesù bħala l-Mexxej u s-Salvatur irxoxtat, kollox jinbidel.

L-ewwel u qabel xejn Alla jagħtina bidu ġdid. Jaċċetta l-mewt taʼ Ġesù bħala ħlas għar-ribeljoni midinba tagħna, u jaħfrilna b’mod liberu u sħiħ. Jimlielna qalbna bl-Ispirtu tiegħu stess u jagħtina ħajja ġdida li tkompli wara l-mewt, saħansitra tul l-eternità. Ma nibqgħux ribelli, imma nsiru parti mill-familja t’Alla stess. Issa ngħixu b’Ġesù, Bin Alla, bħala l-Mexxej tagħna.