1

Maromak, Kriadór no Liurai nebee Diak

Bíblia dehan:

Ami nia Nai no Maromak, Ita Boot mak serve simu glória, onra no podér tanba Ita Boot mak kria buat hotu-hotu. Tuir Ita Boot nia hakarak, buat hotu nee iha. (Apokalipse 4:11)

Fundamentu ba mensajen Kristaun nian mak so Maromak deit mak liurai loloos ba buat hotu-hotu. Nia mak Nai no Liurai ba buat hotu-hotu nebee eziste. La hanesan ho ukun-nain barak iha mundu nee, Maromak la koruptu ka egóista. Nia mak ukun-nain nebee diak tebes no nakonu ho domin. Nunee ho laran luak Nia foo buat hotu nebee Ninia mundu presiza. Nia mos ukun mundu nee ho justu.

Maromak mak ukun-nain ba buat hotu-hotu tanba Nia mak kria buat hotu-hotu. Maromak mak huun no kriadór ba buat hotu nebee eziste, inklui mundu furak nebee ita hela ba. Nunee, mundu nee Maromak nian. Nia mak halo no toma konta ba mundu nee.

Nia mos halo ita.

Maromak kria ema, i foo ba ita fatin hodi hela, fatin nebee úniku iha Ninia mundu nebee diak. Nia haruka ita atu ukun mundu nee, tau matan no responsabiliza ba mundu nee – enkuantu ita mos foo onra no agradese ba Maromak ba Ninia laran-luak, no halo tuir Nia nudar ita nia liurai.

Rezumu
  • Maromak mak liurai ba mundu nee.
  • Nia mak halo mundu nee.
  • Nia mos halo ita hodi ukun Ninia mundu nebee diak, foo agradese no foo onra ba Nia.
Hanesan nee Maromak kria buat hotu-hotu ho furak. Maibee ohin loron ita bele haree ho klaru katak ita nia realidade iha mundu nee kontráriu hosi Maromak nia planu fo-foun. Saida mak akontese?
2

Ita nia Sala Kontra Maromak

Bíblia dehan:

Hanesan bibi-malae, ita hotu lao sees ona hosi dalan loos. Ita ida-idak lao iha ita nia dalan rasik. (Isaias 53:6a)

Buat hotu nebee la loos iha ita nia moris no iha mundu nee mosu tanba ema foti ona desizaun nebee determina sira nia destinu. Hosi hahuu fo-foun, ita lakohi Maromak mak ukun ita. Ita rejeita Nia nudar ita nia liurai, liu hosi desidi atu moris tuir deit ita nia hakarak rasik, laos tuir Maromak nia hakarak.

Ita hotu kontra Maromak iha ita nia moris.

Dala barak, ita ignora Maromak, hadook-aan hosi Nia, i halao moris tuir deit ita nia hakarak rasik. Tuir loloos, ita tenki agradese ba Maromak tanba Nia kria ona ita no foo ba ita buat hotu nebee ita presiza. Maibee ita la foo agradese no la foo onra ba Maromak, i la halo tuir Nia nudar ita nia liurai. Ita halo tuir deit ita nia hakarak, ita nia prioridade rasik, no valor nebee ita rasik deside, liu hosi relijiaun, kultura ka buat seluk.

Bíblia bolu hahalok nebee kontra Maromak nee “sala.” Ita hotu-hotu halo ona sala kontra Maromak, inklui mos ema relijiozu sira.

Ita bele haree katak ita hela iha mundu nebee nakonu ho ema nebee hakarak sai hanesan ‘maromak.’ Ita ida-idak halao ita nia moris tuir deit ita nia hakarak rasik, no koko halo ema seluk no mundu nee hakruuk ba ita nia hakarak rasik.

Bainhira ita koko ukun ita nia aan rasik, klaru, nee sei la lao ho diak. Ita falha no hetan konsekuénsia nebee todan, hanesan estraga ita nia aan rasik no estraga mos ema seluk nebee iha ita nia sor-sorin. Ita mos estraga mundu nebee ita hela ba.

Rezumu
  • Ita hotu rejeita Maromak nudar ita nia liurai liu hosi halao ita nia moris tuir ita nia hakarak rasik.
  • Liu hosi kontra Maromak, ita estraga ita nia aan no ema seluk, no mos estraga mundu nee.
Entaun Maromak sei halo saida ba ema nebee kontra Nia?
3

Maromak nia Justisa

Bíblia dehan:

Hanesan deside nanis ona katak ema mate dala ida, depoizde mate sei simu julgamentu. (Ebreu 9:27)

Nudar liurai nebee diak, Maromak konsidera hahalok nebee kontra Nia nee buat nebee sériu. Nia husu ita hodi responsabiliza ba hahalok aat nebee la foo onra ba Nia, la trata ema seluk ho diak no estraga mos Ninia mundu.

Nee signifika Maromak sei la husik  ema livre hodi kontra Nia tinan ba tinan nafatin. Se Nia husik hahalok aat nee kontinua nafatin, nee la justu.

Maromak nia julgamentu ba ita nia sala kontra Nia mak mate. Tuir loloos, terus, moras no mate la eziste iha mundu nee. Maibee buat sira nee mak parte hosi Maromak nia kastigu ba ema hotu nebee rejeita Nia.

Maibee iha julgamentu seluk tan nebee ita sei hasoru. Loron ida, ita hotu sei hamriik iha Maromak nia futar oin i hataan ba Nia ba buat hotu-hotu nebee ita halo ona iha ita nia moris, oinsaa ita rasik rejeita Maromak nudar ita nia liurai, no oinsaa ita estraga ema seluk no estraga Maromak nia mundu.

Iha loron nee, Maromak sei hamonu sentensa no foo kastigu ba ita tuir buat nebee ita husu ona ba Nia, nee mak moris haketak hosi Nia. Tebes, Maromak sei haketak Ninia Aan hosi ita permanente. Tanba Nia mak huun ba moris no buat diak hotu, nunee ketak hosi Nia signifika ita sei rahun tinan ba tinan.

Hodi simu rezultadu hosi Maromak nia julgamentu nee mak novidade aat liu. Maibee hakarak ka lakohi, ita hotu sei hasoru duni julgamentu nee, tanba ita hotu kulpadu tanba halo sala kontra Maromak.

Rezumu
  • Maromak la husik ita atu kontra Nia tinan ba tinan.
  • Maromak nia kastigu ba ema nebee kontra Nia mak mate no julgamentu.
Susar ba ita hodi rona katak ita hotu iha situasaun nebee grave tebes. Maibee la remata iha nee. Iha mos novidade diak ba ita.
4

Maromak Haruka Jesus hodi Mate ba Ita

Bíblia dehan:

Hanesan bibi-malae, ita hotu lao sees ona hosi dalan loos. Ita ida-idak lao iha ita nia dalan rasik. Maibee NAI Maromak tau ita hotu nia sala iha Nia [Jesus.] (Isaias 53:6b)

Maromak hadomi mundu nebee Nia kria ona, no Nia mos hadomi tebes ita. Nunee Nia la husik ita terus nafatin i simu konsekuénsia hosi ita nia sala kontra Nia. Maibee Maromak haruka Nia Oan mai iha mundu nee hodi salva ita. Nia mak Jesus Kristu.

La hanesan ho ita, Jesus nunka kontra Maromak. Nia moris iha Maromak nia ukun ho perfeitu. Nia foo onra no agradese ba Maromak, no halo tuir Nia iha buat hotu-hotu. Nia la merese simu Maromak nia julgamentu. Nia la merese simu kastigu mate.

Maski nunee, Jesus mate duni. Nia iha podér Maromak nian hodi kura ema moras no halo moris fali ema hosi mate, maibee Jesus husik deit ema prega no oho Nia iha krús Roma nian. Tanba saida Nia halo nunee?

Novidade estraordináriu mak nee. Jesus mate hodi troka fatin ho ita nebee kontra Maromak. Nia simu julgamentu no kastigu nebee tuir loloos ita merese simu, liu hosi Nia mate iha krús iha ita nia fatin. Mate mak kastigu ba ema nebee kontra Maromak, maibee Jesus mak simu fali kastigu nee iha ita nia fatin.

Tuir loloos, ita la merese simu grasa nee. Ita rejeita ona Maromak, maibee tanba Maromak nia domin nebee boot tebes, Nia haruka Ninia Oan Mane Mesak mai hodi mate ba ita.

Rezumu
  • Tanba Ninia domin, Maromak haruka Nia Oan Mane Mesak, Jesus Kristu, mai iha mundu nee.
  • Jesus moris ho perfeitu iha Maromak nia ukun.
  • Maibee Jesus mate iha krús hodi simu Maromak nia kastigu iha ita nia fatin.
Maibee sei iha novidade diak ida tan.
5

Jesus, Liurai no Salvadór nebee Moris Fali

Bíblia dehan:

Hahii ba Maromak, ita nia Nai Jesus Kristu nia Aman! Tuir Ninia mizerikórdia nebee boot, Nia halo ita moris fali hosi mate no foo ba ita esperansa nebee moris. Nia halo nunee liu hosi Jesus Kristu nebee moris fali hosi mate. (1 Pedro 1:3)

Maromak simu Jesus nia mate hanesan presu nebee selu kotu ita nia sala. Depois Maromak halo Jesus moris fali hosi mate. Jesus manaan mate, no moris fali hodi kumpri Maromak nia planu loloos ba ema, nee mak, atu ukun Maromak nia mundu.

Maromak foti Jesus sai liurai, no mos  sai juis ba mundu nee. Loron ida, Jesus sei fila fali mai iha mundu nee hodi lori julgamentu ba ema hotu. Iha loron nee, Jesus sei bolu ita hotu hodi hataan ba Nia kona ba ita nia sala kontra Maromak.

Maibee Jesus laos deit liurai no juis nebee Maromak foti, maibee Nia mos Salvadór nebee salva ita hosi julgamentu. Tanba Nia mate ona iha ita nia fatin, agora Nia oferese ba ita perdaun ba ita nia sala hotu. Nia selu ona ita nia sala hotu. Agora ita bele iha relasaun nebee diak fali ho Maromak. Ita la inimigu tan ona ho Maromak maibee ita sai nudar Maromak nia oan nebee foo onra no agradese ba Nia.

Bainhira ita hahuu moris foun nebee Jesus oferese nee, Maromak rasik hela hamutuk ho ita iha ita nia laran liu hosi Ninia Espíritu. Nunee relasionamentu foun ho Maromak nee halo ita senti haksolok.

Ita bele laran metin katak Maromak sei simu ita bainhira Jesus fila fali mai ho Ninia glória, laos tanba ita merese, maibee tanba Jesus simu ona kastigu nebee ita tenki simu liu hosi mate iha ita nia fatin.

Rezumu
  • Maromak halo Jesus moris fila fali i foti Nia sai liurai no juis ba mundu nee.
  • Jesus manaan ona mate, nunee Nia lori perdaun ba ita no foo moris foun ba ita. Nia sei fila fali mai ho glória.
Entaun, mensajen nee lori impaktu saida ba ita? Iha dalan rua ba ita nia moris. Ita tenki hili ida.
6

Iha Dalan Rua Ba Ita nia Moris

Bíblia dehan:

See deit  mak  fiar ba Oan sei hetan moris rohan laek, maibee see deit mak rejeita Oan sei la haree moris tanba Maromak nia hirus nafatin iha nia. (João 3:36)

Dalan primeiru ba ita nia moris mak ita kontinua kontra Maromak, liu hosi ignora Nia i halao ita nia moris tuir deit ita nia hakarak rasik. Triste, ema barak kontinua hili dalan ida nee ba sira nia moris.

Se ita hili dalan ida nee, rezultadu ikus mak ita tenki hasoru Maromak nia julgamentu nebee justu. Ita tenki simu konsekuénsia hosi ita nia sala iha moris agora. No ita mos tenki hasoru realidade nebee aat liu, nee mak moris ketak hosi Maromak tinan ba tinan.

Maibee iha mos dalan seluk nebee ita bele hili ba ita nia moris, nee mak, ita bele fila fali ba Maromak no husu perdaun ba ita nia sala. Ita bele fiar ba Jesus nudar ita nia Liurai no Salvadór nebee moris fali hosi mate. Se nunee, ita sei hetan mudansa boot iha ita nia moris hanesan tuir mai nee.

Primeiru, Maromak sei hamoos ita nia sala hotu. Maromak simu ona Jesus nia mate nudar presu ba ita nia sala hotu kontra Nia. Nunee Nia sei foo perdaun ba ita ho gratis. Nia sei enxe Nia Espíritu rasik ba ita nia fuan-laran i foo moris foun nebee rohan laek. Ita laos tan Maromak nia inimigu maibee ita sai Maromak nia oan nebee hola parte iha Ninia família rasik. Agora ita bele hela hamutuk ho Jesus, Maromak nia Oan, nudar ita nia liurai.

Rezumu

Iha dalan rua deit ba ita nia moris.

Ita nia dalan

  • Rejeita Maromak nudar ita nia liurai.
  • Moris tuir deit ita nia hakarak rasik.
  • Estraga ita nia aan liu hosi kontra Maromak.
  • Simu kastigu mate no julgamentu

Maromak nia dalan

  • Hakruuk ba Jesus nudar ita nia liurai
  • Laran-metin ba Jesus nia mate no moris fila fali
  • Hetan perdaun hosi Maromak
  • Hetan moris foun nebee rohan laek

Entaun, o hakarak hili dalan ida nebee ba o nia moris?

Oinsaa O Bele Responde

Se o nia resposta ba pergunta, “O hakarak hili dalan ida nebee ba o nia moris?” mak ‘Hau nia dalan,’ dala ruma susar ba o hodi fiar ba mensajen Kristaun nian nebee fahe ona iha livru kiik ida nee. Dala ruma, o la fiar katak ita hotu mak ema sala-nain nebee rejeita ona Maromak nudar liurai, ka o la fiar katak so Jesus deit mak dalan úniku hodi hetan salvasaun.

Se nunee, ami enkoraja o hodi hanoin didiak no buka hatene liu tan kona ba mensajen Kristaun nian molok foti desizaun ikus, tanba iha risku boot se o rejeita mensajen nee. Dala ruma, o rasik bele lee biográfia kona ba Jesus iha livru haat hosi Testamentu Foun – Evanjelhu Mateus, Marcos, Lucas no João. O mos bele lee hamutuk ho maluk Kristaun nebee o konhese, ka bele mos kontaktu igreja lokál ka organizasaun Kristaun nebee bele suporta o.

Maibee, se o rekonhese katak o kontra ona Maromak no hakarak fila fali ba Maromak hodi komesa halao moris tuir Maromak nia dalan, saida mak o presiza halo?

O bele tuir etapa simples tolu tuir mai nee: Koalia ba Maromak, Moris Tuir Jesus, no Fiar metin ba Jesus nafatin.

1. Koalia ba Maromak

Etapa primeiru mak, o bele koalia ba Maromak. Ida nee buat nebee fasíl hodi halo. Rekonhese katak o rejeita ona Maromak no merese simu Maromak nia kastigu. Husu perdaun ba Maromak tanba Jesus mate ona hodi selu o nia sala hotu. Husu Maromak nia tulun atu transforma o hodi bele moris tuir Jesus nudar o nia liurai. O bele halo orasaun ho liafuan hanesan tuir mai nee:

Nai Maromak,

Hau rekonhese katak hau la merese atu Ita Boot simu hau. Hau la merese atu hetan prezenti moris rohan laek hosi Ita Boot. Hau halo ona sala kontra Ita Boot no rejeita ona Ita boot nudar hau nia liurai. Hau presiza Ita Boot nia perdaun.

Obrigadu tanba Ita Boot haruka ona Ita Boot nia Oan Mane Mesak mai hodi mate ba hau nia sala nunee hau bele hetan perdaun. Obrigadu tanba Jesus moris fali hosi mate no foo moris rohan laek ba hau.

Nai, foo perdaun ba hau nia sala. Tulun hau hodi lori mudansa ba hau nia moris tuir Jesus nudar hau nia liurai. Hodi Jesus nia naran, amén.

2. Moris Tuir Jesus

Bainhira halo orasaun hotu ona, etapa segundu mak o bele komesa halao moris tuir Jesus nudar o nia liurai.

Bainhira o komesa moris tuir Jesus, o sei hetan mudansa iha o nia moris. O presiza husik tiha hahalok no atitude nebee kontra Maromak, hanesan kaan-teen, hirus-teen, hanoin deit kona ba o nia aan nst. O mos presiza iha hahalok no atitude foun nebee foo onra ba Maromak, hanesan hatudu laran-luak, domin, pasiénsia nst.

O sei halao moris tuir Jesus nee too o nia vida remata. Maromak sei hamutuk ho o too rohan. Nia sei nafatin koalia ba o bainhira o lee ka rona ba Ninia liafuan nebee hakerek iha Bíblia. Nia sei nafatin rona ba o no tulun o bainhira o halo orasaun ba Nia; Nia sei nafatin foo kbiit ba o no transforma o tuir Ninia hakarak liu hosi Ninia Espíritu nebee hela iha o nia laran. Nia mos sei foo ba o maluk Kristaun sira seluk nebee o bele hasoru beibeik hodi enkoraja o atu tuir Jesus nafatin.

Nunee, etapa segundu nee mak hakruuk ba Jesus no halao moris iha Jesus nia ukun.

3. Fiar metin ba Jesus

Iha mos etapa terseiru, nee mak o presiza fiar metin nafatin ba Jesus.

So liu hosi Jesus deit mak o bele hetan perdaun no dame malu fali ho Maromak. O presiza hanoin fali ba lia-loos nee beibeik, tanba bainhira o esforsu hodi halao moris tuir Maromak nia hakarak, klaru o sei falha no halo sala beibeik. Ita hotu halo ida nee. Nunee, ita hotu presiza fiar metin nafatin deit ba Jesus nia mate nebee lori perdaun ba ita nia sala.

Ita nunka bele para hodi sadere ba Jesus, tanba so liu hosi Jesus deit mak ita bele hetan perdaun no moris rohan laek.

Se o responde ba Maromak ho etapa tolu nee, o bele hatene ho serteza katak o hetan ona perdaun no moris foun hosi Maromak.

Maibee se o la responde ba Maromak ho etapa sira nee, o bele hatene mos ho serteza katak o sei nafatin simu Maromak nia julgamentu.

Hanesan dalan nebee fahe ba rua, iha dalan rua deit ba ita nia moris. Ita hotu tenki hili dalan ida deit.

Saida mak hau presiza halo tuir mai?